Af hverju leggur Fiskistofa ekki til, að hitastig afla verði skráð á vigtarnótur?

Ég rak fiskverkun í 30 ár. Eftir að Fiskistofa kom til sögunnar þá lagaðist sumt, en annað versnaði.  Fiskistofu hefur margsinnis verið bent á - að löggiltur vigtarmaður mæli hitastig í afla, við löndun aflans þegar aflinn er vigtaður á hafnarvog af löggiltum vigtarmanni. Hitastig væri svo skráð á vigtarnótu og kæmi fram  ef aflinn væri boðinn upp á fiskmarkaði.

Hvorki Fiskistofa - eða Reglugerðarmeistari ríkisins hjá sjávarútvegsráðuneytinu hafa viljað heyra neitt um þetta í meira en 20 ár - en allan þann tíma hafa verið til digital hitamælar til að mæla hitastig í fiski við löndun.

Í nokkur ár hafa líka verið til innfarauðir digital hitamælar þannig að vigtarmaður þarf ekkert að snerta aflann. Þetta hefur alltaf verið augljóst - að þetta er það eina sem dugar til að allir fari að kæla aflann vel á sjó.

Þá kemur að næstu dellu hjá Fiskistofu og Reglugerðarmeistara ríkisins.  Fyrir um 15 árum var skipuð nefnd til að endurskoða svokallaða "3% reglu" - en það er "heilög uppfinning Reglugerðameistara ríkisins sem ekki má hrófla við. 

Þegar aflanum er landað - með engum ís - þá er bara ísvatn 3-4% á nýveiddum fiski. Ef fiskurinn er slægður og ísaður í nokkra daga - bætist við fiskihor sem kemur úr roði fisksins. Vatn/sjór+ fiskihor getur því aldrei verið minna en 5% - og þá VANTAR ÍSINN á fiskinn sbr. fréttina. Myndin hér að ofan til vinstri sýnir vel ísaðan afla en þarna er ísinn a.m.k. 12%. Svona vel ísaðan fisk, þarf ekkert að endurvigta, enda skaðar endurvigtun hráefnið - það kemur los í fiskinn sem verðfellir hráefnið/aflann - sérstaklega á sumrin þegar fiskar vaxa hratt og fiskholdið er þá viðkvæmt.

Lengi hefur verið ljóst, að heimila ætti löggiltum vigtarmanni á hafnarvog að meta ís í afla 7-12%.   Þá þarf ekkert að endurvigta.  Fiskistofa sjálf kvartaði yfir vigtarsvindli í endurvigtun - en ef svo er - er það 100% á ábyrgð Fiskistofu og Reglugerðarmeistara ríkisins sem skilur ekki að 3% regla - er ávísun á að einhverjir geri "viðeigandi ráðstafanir.

Nefnd sem Árni Mathiessen fyrrv.ráðherra skipaði um þetta - lagði til 7% ísfrádrátt á hafnarvog í stað 3% reglu.  Reglugerðarmeistara ríkisins hugnaðist ekki breytingar á neinu - og þar við sat og situr enn.

Svona er með mörg af þeim "vandamálum" sem annað slagið koma upp á yfirborðið - vigtarsvindl, vankældur fiskur og svo ekki sé minnst á brottkast afla.  Margt af þessu má rekja til ósveigjanleika og/eða vanþekkingar allra Reglugerðameistara ríkisins samanlögð vanþekking þeirra á atvinnugreininni virðist stærsta vandamál framþróunar á þessu sviði.

Til að gæta sanngirni, þá er frábær kælitæknin í nýju fiskiskipunum sem hafa verið að koma til landsins. Vandamál við kælingu er aðallega hjá minni fiskiskipum, en Reglugerðarmeistarar ríkisins virðast vilja hafa reglugerðir þannig að það komi sem mestu óorði á smærri útgerðir og smærri fyrirtæki = smærri sjávarbyggðir en það virðist þegjandi samkomulag Reglugerðarmeistara ríkisins að útrýma allri smærri atvinnustarfsemi í sjávarútvegi og þar með smærri sjávarbyggðum.

Hvers vegna? Ég bara spyr.

Fróðlegt væri að fá skýringu - [e-mail]

 

„Enginn ís sjáanlegur um borð“